chuuuppse

That's a long disgusted suck teeth for the non-west indians reading-- how very little of them that bother to read my gribbrish...
One big long chuuupppssseee...Why?? cause today is Kadooment in Barbados, bare bacchanal inna de streets, music fuh days, sweet calypso wukking and getton bad nasty stink music, and I can't hear a peep outta VOB 92.9. What a damned waste of a radio station. Did I mention that I also couldn't get to hear de Pic-O-De-Crop Calypso finals friday night?? think deese readio stations sweet. De height ah de listening period dat we ex-pats wanna hear wha gine on and dem not streaming. Ah firing dem want firing...cha.... De damned site won't even come up, like evabodie dat wuk at VOB down Spring Garden and left we up inna North & South America stran out...chuuppsssee. Yuh think de Nation online (dat be we Bajan newspaper) even updated...naaahh dem still got up yesterday news.....is wha madness dis....chuuuppppsseeee. and these is news entites dat sey demselves ready tuh move fwd inna de world....chuupppsseee.
I gine gotta call Lickmout Lou or Mavis Beckles and tell dem muh piece, betta yet, me ah call Eric Lewis--alla deese people Bajan columinist who tel it like it is..... Jdid ova at Doan Mind Me vex cause he ein get he Bajan girl pic, but me, is one big long chuuuppssssee cause i ein even hearing who gonna win road march fuh dis year.

So yuh al might be asking...so wha is de big fuss...well let me tell yuh, de big fuss is dat Crop Ova is de premier carnival fuh Barbados. It's the attraction of all attractions. Bare visitors from a foreign ah come pun we shores fuh dis one day, Drink a Banks (best beer on the Earth) nuh mind de Trinis does talk bout ah Caribe or de J'cans bout Red Stripe, if yuh want a real beer it's the award winnng Banks of Barbados dat yuh gotta drink. Throw back ah shot or two ah Mount Gay, another Bajan classic, the oldest rum pun de planet..ah true dat. Yuh see de visitors come tuh lime and party, spend much foreign currency and pump up de economy. Crop Over and Kadooment is where careers are made and many are broken. It the time for our local entertainers to shine and hopefully seen or be seen by international recording companies. Look Rupee and Keeann. so it's a big deal fuh we Bajans, tuh hail up we peoples and be proud. So yuh beginning tuh see de picture now. why ah vex dat de radio stations or newspapers not representing.

Anyhow...ah gone..one big long chuupppsssee at VOB 92.9.com and nationews.com